Volume interior dos espazos pechados do barco, expresado en arqueo bruto de Gross Tonnage.

Deberán incluírse no rexistro de buques pesqueiros da Comunidade Autónoma de Galicia as embarcacións pesqueiras e auxiliares das listas terceira e cuarta do Rexistro de matrícula de buques con porto base en Galicia, que estean operativas.
Un buque operativo é aquel que, estando matriculado nas listas terceira e cuarta do Rexistro de matrícula de buques e no Rexistro mercantil, fose despachado para labores de pesca marítima ou para labores auxiliares de pesca marítima ou explotacións de acuicultura, como mínimo unha vez nos últimos vinte e catro meses e que manteña ademais a capacidade de permanecer en servizo.

O Rexistro de matrícula levarase en varios libros foliados denominados listas nos cales se rexistran os buques, embarcacións e artefactos navais atendendo a súa procedencia e actividade:

• Lista primeira: rexistraranse as plataformas de extracción de produtos do subsolo mariño, os remolcadores de altura, os buques de apoio e os dedicados ao subministro a ditas plataformas que non estean rexistrados noutra lista.
• Lista segunda: rexistraranse os buques de construción nacional ou importados segundo a lexislación vixente que se dediquen ao transporte marítimo de pasaxeiros, de mercadorías ou de ambos os dous.
• Lista terceira: rexistraranse os buques de construción nacional ou importados segundo a lexislación vixente destinados á captura e extracción con fins comerciais de peixe e de outros recursos mariños vivos.
• Lista cuarta: rexistraranse as embarcacións auxiliares de pesca, as auxiliares de explotacións de acuicultura e os artefactos dedicados ao cultivo ou estabulación de especies mariñas.
• Lista quinta: rexistraranse os remolcadores, embarcacións e artefactos navais dedicados aos servizos de portos, radas e bahías.
• Lista sexta: rexistraranse as embarcacións deportivas ou de recreo que se exploten con fins lucrativos.
• Lista sétima: rexistraranse as embarcacións de construción nacional ou debidamente importadas, de calquera tipo ou cuxo uso exclusivo sexa a práctica do deporte sen propósito lucrativo ou a pesca non profesional.
• Lista oitava: rexistraranse os buques e embarcacións pertencentes a organismos de carácter público tanto de ámbito nacional como autonómico ou local.
• Lista novena (rexistro provisional): anotaranse con este carácter os buques, embarcacións ou artefactos navais en construción desde o momento que se autoriza, exceptuándose as embarcacións deportivas construídas en serie, coa debida autorización.

A Consellería de Medio Rural e do Mar clasifica os concellos onde se realiza produción ou extracción de marisco atendendo ao seguinte listado:

• Zona I-Vigo: abrangue os concellos bañados polo Río Miño ata Punta Soavela; isto é, A Guarda, a zona de Arcade no concello de Soutomaior, Baiona, Cangas, Moaña, Redondela, Vigo e Vilaboa.
• Zona II-Pontevedra: abrangue dende Punta Soavela a Punta Faxilda, isto é, a zona de Aldán-Hio (en Cangas do Morrazo), Campelo (en Poio) e os concellos de Bueu, Marín, Pontevedra e Portonovo.
• Zona III-Arousa: abrangue dende Punta Faxilda a Punta Sieira, isto é, a zona bañada pola Ría de Arousa e os concellos de Ribeira, Boiro, Cambados, Carril, O Grove, A Pobra do Caramiñal e Rianxo.
• Zona IV-Muros: abrangue dende Punta Sieira ata a Punta Insua, isto é, os concellos de Muros, Noia, Porto do Son e Portosín.
• Zona V-Fisterra: abrangue dende Punta Insua ata o Cabo Touriñán, é dicir, a costa dos concellos de Carnota, Corcubión e Fisterra.
• Zona VI-Costa da Morte: abrangue dende o Cabo Touriñán a Punta Langosteira, isto é o areal de Baldaio, no concello de Carballo, a zona de Caión, no concello da Laracha, as marxes do Río Anllóns, incluíndo a súa desembocadura (na localidade de Corme, que pertence a Ponteceso), e os concellos de Camariñas, Laxe, Malpica e Muxía.
• Zona VII-Coruña-Ferrol : abrangue dende Punta Langosteira a Cabo Prioriño, isto é os concellos da Coruña, Fene, Ferrol, Miño, Mugardos, Pondedeume e Sada.
• Zona VIII-Cedeira: abrangue dende o Cabo Prioriño ata o Cabo de Bares, é dicir, os concellos de Cariño, Cedeira e os areais de Espasante, no concello de Ortigueira.
• Zona IX-Mariña: abrangue dende o Cabo de Bares ata o Río Eo, e comprende a zona do Barqueiro (no concello coruñés de Mañón) e os concellos de Burela, Celeiro, Cervo, O Vicedo e Ribadeo.