Economía. Os sectores de actividade
Definicións e conceptos teóricos

A Clasificación Nacional de Actividades Económicas (CNAE) é unha clasificación que permite categorizar as empresas e institucións de acordo coa actividade económica que desempeñan. Esta clasificación é moi útil para facer estatísticas relacionadas coa participación das unidades produtivas no proceso económico.

A partir do día 1 de xaneiro de 2009 aplícase a CNAE-2009

Dentro do sector da agricultura inclúense as seguintes actividades económicas: agricultura, gandaría, caza, silvicultura e explotación forestal. Dentro do sector pesqueiro está incluída, ademais da pesca, a acuicultura.

Na seguinte táboa móstrase a evolución da poboación ocupada galega segundo os sectores de actividade económica nos que desempeñan a súa labor:

Poboación ocupada en Galicia segundo os sectores de actividade
Miles de persoas

A partir da táboa anterior podemos calcular a distribución da poboación ocupada no sector primario para eses anos:

Poboación ocupada en Galicia segundo os sectores de actividade
Miles de persoas e porcentaxes

Evolución da poboación ocupada na agricultura e pesca en Galicia
Miles de persoas

Segundo se desprende dos datos publicados pola Consellería do Medio Rural, no ano 2019 aproximadamente o 61% da superficie de Galicia era forestal. O 15,4% da superficie estaba dedicada a prados e pasteiros.

En Galicia no ano 2019 dedicáronse un total de 282.271 hectáreas a cultivos forraxeiros. O seguinte grupo de cultivo en importancia é o dos cereais-gran ao que se dedicou 34.148 hectáreas de superficie.

No tocante aos cultivos leñosos, en 2019, había un total de 11.584 ha de froiteiras, 24.855 de castiñeiros e a superficie total de viñedo chegou ás 24.134 hectáreas.

Nesta táboa preséntase o produto interior bruto de Galicia no ano 2019 e a prezos correntes por ramas de actividade:

A agricultura, gandaría, silvicultura e pesca supuxo en 2019 un 4,5% do PIB do total da economía galega. A contribución do sector primario ao PIB nos últimos 20 anos sufriu un descenso bastante pronunciado, pasando do 12% no ano 1986 ao 4,5% en 2019, debido a que Galicia pasou de ser unha comunidade agraria e pesqueira a ser unha comunidade onde o peso da economía recae no sector servizos.

O sector industrial (incluída a enerxía) agrupa as seguintes actividades económicas (segundo a CNAE 2009):

• Industrias extractivas
• Industrias manufactureiras
  • Industria da alimentación
  • Fabricación de bebidas
  • Industria do tabaco
  • Industria téxtil
  • Confección de roupa de vestir
  • Industria do coiro e do calzado
  • Industria da madeira e da cortiza, agás mobles; cestaría e espartaría
  • Industria do papel
  • Artes gráficas e reprodución de soportes gravados
  • Coquerías e refinación de petróleo
  • Industria química
  • Fabricación de produtos farmacéuticos
  • Fabricación de produtos de caucho e plásticos
  • Fabricación doutros produtos minerais non metálicos
  • Metalurxia; fabricación de produtos de ferro, aceiro e ferroaliaxes
  • Fabricación de produtos metálicos, agás maquinaria e equipamento
  • Fabricación de produtos informáticos, electrónicos e ópticos
  • Fabricación de material e equipamento eléctrico
  • Fabricación de maquinaria e equipamento n.c.n.
  • Fabricación de vehículos de motor, remolques e semirremolques
  • Fabricación doutro material de transporte
  • Fabricación de mobles
  • Outras industrias manufactureiras
  • Reparación e instalación de maquinaria e equipamento
• Fornecemento de enerxía eléctrica, gas, vapor e aire acondicionado
• Fornecemento de auga, actividades de saneamento, xestión de residuos e descontaminación

No ano 2020 había en Galicia 182.400 ocupados na industria, o que supón o 17,0% do total de traballadores galegos. Esta porcentaxe, en Galicia, non é moi distinta da que se observaba hai 30 anos, cando tamén arredor do 17% dos ocupados galegos traballaban na industria.

Na seguinte táboa móstrase o número de empresas con sede social en Galicia segundo a súa actividade principal para o ano 2019.

No ano 2019 había un total de 14.708 empresas dedicadas á industria (incluída a enerxía) que tiñan a sede social en Galicia. O groso destas industrias son a industria da alimentación (2.363), a fabricación de produtos metálicos (2.355) e a reparación e instalación de maquinaria e equipamento (1.371).

O Instituto Nacional de Estadística (INE) elabora o Índice de produción industrial (IPI). Este índice mensual mide a evolución da produción das ramas industriais. Trata, polo tanto, de medir a cantidade e a calidade, eliminando a influencia dos prezos.

No ano 2019 o valor engadido bruto da industria ascendeu aos 10.405 millóns de euros (datos avance), polo que a contribución desta rama ao total da economía galega situouse no 16,3%.

Tradicionalmente o sector da construción agrupábase dentro da industria no denominado sector secundario. Na actualidade este sector cobrou a suficiente importancia, tanto no número de ocupados como en contribución ao PIB, para ser contabilizado a parte.

Evolución da poboación ocupada no sector da construción en Galicia
Miles de persoas

Dende o ano 1994 ata ano 2007 produciuse un repunte da poboación ocupada no sector da construción. No ano 2007, en Galicia existían preto de 146.300 traballadores ocupados neste sector (o 12,3% do total de ocupados). A partir deste ano obsérvase unha caída no número de ocupados neste sector ata chegar aos 75.100 traballadores no ano 2020 (o 7,0% do total de ocupados).

A partir das licenzas de obra maior que conceden os concellos para a construción, rehabilitación ou demolición de edificios, podemos coñecer ou estimar o número de vivendas que se van crear.

Un claro indicador da evolución do sector da construción en Galicia é a evolución do número de vivendas a crear. Como se pode ver na táboa anterior, ata o ano 2007 o número de vivendas a crear de nova planta incrementouse notablemente, pero a partir deste ano co estalido da burbulla inmobiliaria o número de vivendas a crear desplomouse.

O sector servizos agrupa as seguintes actividades económicas segundo a CNAE 2009:

• Comercio por xunto e ao retallo; reparación de vehículos de motor e motocicletas
• Transporte e almacenamento
• Hostalaría
• Información e comunicacións
• Actividades financeiras e de seguros
• Actividades inmobiliarias
• Actividades profesionais, científicas e técnicas
• Actividades administrativas e servizos auxiliares
• Administración pública e defensa; seguranza social obrigatoria
• Educación
• Actividades sanitarias e de servizos sociais
• Actividades artísticas, recreativas e de entretemento
• Outros servizos
• Actividades dos fogares como empregadores de persoal doméstico; actividades dos fogares como produtores de bens e servizos para uso propio
• Actividades de organizacións e organismos extraterritoriais

Evolución da poboación ocupada no sector servizos en Galicia
Miles de persoas

O total de ocupados no ano 2020 no sector servizos era 747.700 traballadores. Tendo en conta que neste ano existían un total de 1.074.200 ocupados, podemos concluír que o 69,6% dos traballadores galegos desempeñaban a súa labor no sector servizos.

En termos porcentuais o sector servizos pasou de dar traballo a pouco máis do 30% dos ocupados a comezos dos anos oitenta, a ocupar o 69,6% dos traballadores en 2020.

En 2019 (media anual) existían en Galicia un total de 1.418 establecementos hoteleiros (estrelas de ouro e estrelas de prata) e 452 establecementos de turismo rural, cunha capacidade total de 65.640 prazas.

Podes obter datos máis actuais sobre o número de establecementos e a súa capacidade en:

No ano 2019 (datos avance) o valor engadido bruto do sector servizos foi de aproximadamente 40.302 millóns de euros, o 63% do PIB galego.