Emprégase para comparar datos cualitativos ou cuantitativos discretos. No eixo horizontal represéntanse os datos e no vertical as frecuencias (absolutas ou relativas). En cada dato situamos un punto á altura da frecuencia correspondente. Ao unir estes puntos fórmase o polígono de frecuencias. Son especialmente adecuados en estudos nos que os datos son de tipo temporal: anos, días da semana, idades, ...
Tamén se poden construír unindo os puntos medios dos lados superiores de cada barra no diagrama de barras.
Exemplo
No seguinte polígono de frecuencias preséntase as vivendas segundo o número de ocupados para o ano 2010 (miles de vivendas):
Carácter estatístico: número de ocupados
Variable estatística discreta
Datos
Frecuencia absoluta
Frecuencia relativa
Porcentaxe
xi
Ni
fi
%
0
339,7
0,333
33,3%
1
340,0
0,333
33,3%
2
274,7
0,269
26,9%
3
53,0
0,052
5,2%
4
10,4
0,010
1,0%
5 ou máis
2,0
0,002
0,2%
N=1.019,8
100%
Vivendas familiares segundo o número de ocupados Galicia. Ano 2010
Abrimos un libro de Excel onde teñamos os datos que queremos representar no polígono de frecuencias, por exemplo o libro ExemploGraficos3.xls que contén as vivendas familiares segundo o número de ocupados para o ano 2010.
Situámonos na folla "Ocupados" e seleccionamos o rango de datos que queremos representar no polígono de frecuencias. Neste caso como o que nos interesa é mostrar as vivendas familiares segundo o número de ocupados seleccionaríamos o rango de celas A6:B11. ¡Ademais dos datos que queremos representar tamén seleccionamos o nome das categorías, neste caso o número de ocupados! É moi importante NON seleccionar a categoría co total de vivendas.
Para rematar pinchamos no botón "Finalizar" e obtemos o polígono de frecuencias para o número de vivendas segundo o número de persoas ocupadas para Galicia no ano 2010.
(Se queres ver o vídeo a pantalla completa pincha neste enlace)
Abrimos unha folla de cálculo de OpenOffice ou de LibreOffice onde teñamos os datos que queremos representar no polígono de frecuencias. Imos utilizar unha táboa de datos moi similar á da explicación anterior, polo que abrimos o arquivo ExemploGraficos3.ods, que contén as vivendas familiares de Galicia segundo o número de ocupados para o ano 2012.
Situámonos na folla "Datos" e seleccionamos o rango que queremos representar, con inclusión da columna coas etiquetas da categoría número de ocupados. Nun principio, o asistente para gráficos vai interpretar que a variable número de ocupados, ao ser numérica, tamén é unha serie a representar no gráfico, pero máis adiante poderemos indicarlle que se trata das etiquetas do eixo x.
A continuación, na barra de menús seleccionamos "Inserir", submenú "Gráfico". Nun principio, o asistente para gráficos amosa unha vista preliminar dos datos nun gráfico de barras.
No asistente para gráficos, en tipo de gráfico, escollemos "Áreas". Na última versión de OpenOffice Calc existe a posibilidade de representar catro tipos distintos de polígonos de frecuencias: normal, en pilas e porcentaxe apilado. Neste caso imos representar un polígono normal. Prememos o botón "Seguinte >>".
Comprobamos que o rango de datos é o que efectivamente queremos que se amose. Para que a variable número de ocupados deixe de mostrarse como unha serie e se visualice como as etiquetas do eixo x, seleccionamos o recadro de "Primeira columna como etiqueta". Prememos o botón "Seguinte >>".
Na seguinte pestana do asistente ofrécesenos a posibilidade de engadir novas series na representación, ou eliminar algunha das existentes. É útil cando se queren representar series de datos procedentes de dúas táboas distintas. Tamén podemos engadirlle a etiqueta á lenda, para o cal prememos no recadro “Rango para Nome” e situámonos na cela “Galicia”. Prememos no botón "Seguinte >>".
Nesta pestana podemos engadir un título e un subtítulo ao polígono, o nome ou unidade dos eixos x e y, e cambiar a posición da lenda (ou mesmo eliminala, se non desexamos que se amose no gráfico).
Se en calquera momento da configuración das características do gráfico nos equivocamos, o asistente para gráficos permítenos retroceder premendo o botón "<< Regresar".
Para rematar, pinchamos no botón "Finalizar" e obtemos o polígono de frecuencias co número de ocupados nas vivendas familiares galegas, para o ano 2012.
Unha vez abandonado o asistente para gráficos, para alterar as características do mesmo haberá que acudir aos menús "Formato" e “Inserir” da barra de tarefas. Por exemplo, imos engadir etiquetas cos valores de cada unha das categorías que se amosan no gráfico, e formatar o eixo x:
Para engadir etiquetas aos datos prememos no menú “Inserir” e, a continuación, en “Etiqueta datos”.
Se queremos modificar o formato das etiquetas, por exemplo, para que os números aparezan cun decimal, seleccionamos “Amosar valores como números” e prememos en “Formato de número...”.
Desmarcamos o recadro “Formato fonte” e no apartado de opcións, escollemos un decimal e marcamos “Separador de miles”. Prememos o botón “Aceptar”.
Para modificar o formato do eixo y, situámonos derriba del e prememos o botón dereito do rato. No despregable escollemos “Formato de eixos...”.
Se, por exemplo, quixésemos que os números do eixo y apareceran sen decimais, iríamos ao menú “Números” e repetiríamos o proceso que aplicamos para modificar o formato das etiquetas.
Mediante a aplicación dispoñible na páxina web do IGE
A páxina web do IGE ( www.ige.eu) permite elaborar gráficos a partir das táboas dispoñibles na web.
Unha vez teñamos a táboa cos datos que nos interesa, por exemplo as vivendas familiares segundo o número de ocupados para o ano 2010 por provincias: Galicia, A Coruña, Lugo, Ourense e Pontevedra só hai que premer no botón de "Ver gráfico". Por defecto móstrase unha gráfica de barras.
Hai que ter en conta que a táboa ten que estar construída dun xeito determinado para que a gráfica saia como nos interesa:
As categorías da variable que queremos representar deben estar colocadas nas columnas (número de ocupados por vivenda).
Non debe aparecer seleccionada a categoría "Total" que mostra o número total de vivendas.
Non podemos ter máis dunha categoría en filas.
A gráfica resultante podémola gardar como imaxe premendo sobre ela co botón dereito do rato e seleccionando a opción "Gardar imaxe como ..."
Máis exemplos
Cos datos de fogares segundo o número de persoas que podes descargarte en ExemploGraficos1.xls constrúe un polígono de frecuencias cos fogares galegos segundo o número de membros.
E se agora probas a construír unha táboa na web, descargala, abrila con OpenOffice Calc, e construír un polígono de frecuencias? Abaixo atoparás un vídeo demostrativo. Proba a facelo ti mesmo a partir desta táboa da páxina web, onde se clasifica aos fogares galegos segundo uns determinados intervalos de ingresos mensuais. Constrúe o polígono de frecuencias desta táboa para Galicia e o último ano dispoñible.
(Se queres ver o vídeo a pantalla completa pincha neste enlace)
Localizamos na páxina web a información que queremos representar e construímos a táboa de valores. Por exemplo, imos representar o número de ocupados nas vivendas familiares de Galicia no ano 2012
Primeiro seleccionamos as categorías que imos visualizar de cada variable; neste caso escollemos, da variable tempo, o ano 2012; da variable número de ocupados na vivenda, todas as categorías (prememos no botón "Selec. todos"); da variable número total de persoas na vivenda, a categoría "Total"; e da variable espazo, Galicia e provincias (no canto de ir seleccionando categoría a categoría, podemos marcar o recadro "Esp./Galicia" para seleccionar Galicia, e/ou o recadro "Provincias" para seleccionar todas as provincias).
A continuación decidimos en cal dos eixos imos visualizar cada unha das variables, e cales van actuar como filtro. Neste caso, a variable número de ocupados na vivenda irá en filas (hai que premer no botón "En filas"), a variable espazo en columnas (hai que premer no botón "En columnas"), e as restantes actúan como filtros (hai que desmarcar ambas pestanas, "En filas" e "En columnas"). Prememos o botón "Ver táboa de datos" para visualizar a información.
Para descargar a información da táboa e poder traballar con ela en OpenOffice Calc, prememos o botón "Descargar datos" e escollemos a opción "Excel - Formato nativo (.xls)". Gardamos o arquivo resultante nunha carpeta ou no escritorio.
Localizamos o arquivo descargado no ordenador, prememos derriba co botón dereito do rato e escollemos a pestana de "Abrir con OpenOffice Calc".
Para representar o polígono de frecuencias en OpenOffice/LibreOffice Calc, consulta a explicación no apartado anterior.
