Contas do sector fogares
Resumo de resultados 27/03/2020
descarga en pdf 
- Introdución
- Renda dispoñible bruta dos fogares
- Valor engadido bruto do sector fogares
- Saldo de rendas primarias e distribución secundaria da renda
- Distribución de ingresos e gastos
- O papel das transferencias sociais en especie na economía dos fogares
- A distribución da renda dos fogares entre o gasto en consumo final e o aforro
- Definicións e máis información
Introdución
volver ao índice 
As contas do sector fogares son unha operación estatística do Sistema de Contas Económicas de Galicia cuxo núcleo principal está formado polas Contas económicas e o Marco Input-Output, ambas operacións consolidadas segundo o Plan galego de estatística.
Proporcionan información da sucesión de contas correntes do sector institucional fogares. Entre as súas utilidades están:
- Coñecer a achega do sector fogares á economía galega e estudar a súa evolución.
- Coñecer e analizar as rendas primarias que os fogares reciben pola súa participación directa no proceso de produción (rendas do traballo: asalariado e autónomo) e a xerada como propietarios dun activo financeiro ou recurso natural a cambio de proporcionar fondos ou poñelo a disposición doutra unidade institucional (rendas da propiedade).
- Ofrecer información sobre o proceso de redistribución da renda a través dos impostos correntes sobre a renda e o patrimonio, as cotizacións e prestacións sociais e as transferencias correntes.
- Proporcionar información sobre a renda dispoñible bruta dos fogares galegos e a súa capacidade de aforro.
- Achegar información do impacto das transferencias sociais en especie, con orixe maioritariamente no sector público, na renda dispoñible.
Na difusión de resultados inclúense, así mesmo, datos da renda dispoñible por habitante. A poboación utilizada neste cálculo é a poboación a 1 de xullo de cada ano, estimada como promedio da poboación a 1 de xaneiro do ano t e a 1 de xaneiro do ano t+1, a partir das Cifras poboacionais de referencia que elabora o IGE.
Publícase a serie 2010-2017 da sucesión de contas correntes do sector institucional fogares e o dato de 2018 do agregado “Renda dispoñible bruta dos fogares”. Esta publicación é coherente coas operacións estatísticas do Sistema de Contas Económicas de Galicia publicadas na “Revisión estatística 2019”.
Nota: o dato de 2018 é avance e o resto son provisionais.
Renda dispoñible bruta dos fogares
volver ao índice
A renda dispoñible bruta dos fogares ascendeu a 41.025 millóns de euros no 2018.
A renda dispoñible bruta é o saldo contable da conta de redistribución da renda e mide a renda que os fogares teñen dispoñible para destinar ao gasto en consumo final ou ben ao aforro. No ano 2017, a renda dispoñible bruta dos fogares ascendeu a 39.635 millóns de euros, isto é un 2,3% superior ao dato do ano 2016. Polo que respecta ao ano 2018 (estimación avance), a renda dispoñible bruta dos fogares galegos foi de 41.025 millóns de euros, un 3,5 % superior á do ano anterior.
Renda dispoñible bruta. Galicia
Unidade: miles de euros, euros por habitante
| Tempo | Renda dispoñible bruta | Renda dispoñible bruta por habitante (euros) |
|---|---|---|
| 2010 | 39.181.066 | 14.129 |
| 2011 | 39.028.089 | 14.076 |
| 2012 | 36.846.884 | 13.316 |
| 2013 | 36.900.347 | 13.395 |
| 2014 | 36.671.796 | 13.379 |
| 2015 | 37.738.181 | 13.836 |
| 2016 | 38.738.663 | 14.268 |
| 2017 | 39.635.223 | 14.643 |
| 2018 | 41.024.589 | 15.184 |
Evolución da Renda dispoñible bruta e do Produto interior bruto. Galicia
Unidade: porcentaxes
Fonte: IGE. Contas do sector fogares (descarga da táboa), IGE. Contas económicas anuais (descarga da táboa), IGE. contas económicas trimestrais (descarga da táboa)
Entre 2015 e 2017, a renda dispoñible bruta dos fogares medrou aínda que a un ritmo menor do que o fixo a economía. Porén, en 2018 o crecemento da renda dispoñible dos fogares foi lixeiramente superior ao do Produto interior bruto.
En 2018, a renda dispoñible bruta por habitante foi de 15.184 euros, un 3,7% máis elevada que no período anterior.
Valor engadido bruto do sector fogares
volver ao índice
O sector fogares achega o 22,8% do Produto interior bruto galego en 2017
Fixámonos agora no sector fogares como a agrupación das persoas na súa faceta de produtores de bens e servizos, é dicir, estamos a falar da actividade produtiva dos traballadores por conta propia non constituídos en sociedade. Na actividade dos fogares tamén se inclúen os servizos de aluguer das vivendas ocupadas polos seus propietarios.
O valor engadido bruto xerado por este colectivo en 2017 foi de 13.580 millóns de euros, o cal supón o 22,8% do Produto interior bruto (PIB) de Galicia e un crecemento do 2,2% con respecto ao período anterior.
Valor engadido bruto do sector fogares e Produto interior bruto. Galicia
Unidade: miles de euros, porcentaxes
| Tempo | Valor engadido bruto | Produto interior bruto | porcentaxe sobre o PIB |
|---|---|---|---|
| 2010 | 13.611.167 | 56.957.719 | 23,9 |
| 2011 | 13.140.574 | 55.626.795 | 23,6 |
| 2012 | 12.745.529 | 53.498.644 | 23,8 |
| 2013 | 12.791.579 | 53.282.968 | 24,0 |
| 2014 | 12.562.841 | 53.868.171 | 23,3 |
| 2015 | 12.778.882 | 55.568.111 | 23,0 |
| 2016 | 13.289.139 | 57.556.152 | 23,1 |
| 2017 | 13.579.987 | 59.508.243 | 22,8 |
Fonte: IGE. Contas do sector fogares (descarga da táboa), IGE. Contas económicas anuais (descarga da táboa)
Saldo de rendas primarias e distribución secundaria da renda
volver ao índice
O saldo das rendas primarias increméntase un 3,1% no 2017
A renda primaria defínese como a renda que reciben as unidades residentes en virtude da súa participación directa no proceso de produción e a renda a cobrar polo propietario dun activo financeiro ou dun recurso natural por facilitar fondos ou poñer os recursos naturais a disposición doutra unidade institucional. É dicir, sería a renda que obteñen os fogares antes de que interveña ningún mecanismo de redistribución. Se atendemos ao saldo das rendas primarias do sector fogares, vemos que no ano 2017 presentan un incremento do 3,1% con respecto ao ano anterior.
Saldo de rendas primarias. Galicia
Unidade: miles de euros
| Tempo | Saldo das rendas primarias bruto |
|---|---|
| 2010 | 40.014.457 |
| 2011 | 39.635.211 |
| 2012 | 37.023.294 |
| 2013 | 36.940.379 |
| 2014 | 36.880.666 |
| 2015 | 37.575.883 |
| 2016 | 38.752.190 |
| 2017 | 39.941.999 |
Fonte: IGE. Contas do sector fogares (descarga da táboa)
Así pois, o crecemento en 2017 da renda dispoñible bruta responde a un crecemento das rendas primarias dos fogares, como xa ocorrera no ano 2016. Porén, no ano 2015, o crecemento da renda dispoñible estaba relacionado con un incremento das prestacións sociais que perciben, principalmente en forma de pensións de xubilación e tamén prestacións de desemprego, que viñan a compensar a caída das rendas primarias.
No ano 2017 o saldo das rendas primarias foi maior que a renda dispoñible bruta. Isto significa que, no proceso de redistribución da renda, os recursos (prestacións sociais e outras transferencias correntes recibidas) son inferiores aos empregos (impostos correntes sobre a renda e patrimonio, cotizacións sociais e outras transferencias correntes pagadas).
Distribución de ingresos e gastos
volver ao índice
A Renda dispoñible bruta é un saldo contable dunha serie de recursos (ou ingresos) e empregos (gastos) que se recollen nas contas de asignación da renda primaria e distribución secundaria da renda.
| Recursos | 2010 | 2017 |
|---|---|---|
| Excedente de explotación bruto | 4.249.976 | 4.335.941 |
| Outras transferencias correntes | 2.672.704 | 3.240.943 |
| Prestacións sociais distintas das transferencias sociais en especie | 11.364.015 | 12.460.571 |
| Remuneración dos asalariados | 27.056.948 | 26.403.937 |
| Renda mixta bruta | 7.202.077 | 7.379.812 |
| Rendas da propiedade | 2.136.548 | 2.031.790 |
| Empregos | 2010 | 2017 |
|---|---|---|
| Cotizacións sociais netas | 8.529.468 | 8.156.420 |
| Impostos correntes sobre a renda, o patrimonio, etc. | 3.873.185 | 4.405.858 |
| Outras transferencias correntes | 2.467.457 | 3.446.012 |
| Rendas da propiedade | 631.092 | 209.481 |
Fonte: IGE. Contas do sector fogares (descarga da táboa)
No ano 2017, a remuneración dos asalariados representa un 47,3% dos recursos totais dos fogares, o excedente de explotación/ renda mixta achega o 20,9% dos recursos, mentres as prestacións sociais acadan un 22,3%. As outras transferencias correntes (que inclúen bolsas de estudo, remesas de emigrantes, transferencias entre fogares e outras rendas) e rendas da propiedade achegan un 9,5% dos recursos.
O 50,3% dos empregos totais do sector fogares son cotizacións sociais, isto é, achegas dos fogares aos sistemas de prestacións sociais. Séguelle en relevancia os impostos sobre a renda, o patrimonio, etc., cun peso no total dos gastos do 27,2%.
Distribución dos recursos
Unidade: porcentaxe (%)
Distribución dos empregos
Unidade: porcentaxe (%)
O cociente entre cotizacións sociais e prestacións sociais foi do 65,5% no ano 2017, cando no inicio do período era do 75,1%.
O papel das transferencias sociais en especie na economía dos fogares
volver ao índice
En 2017 as transferencias sociais en especie superaron os 8.307 millóns de euros
As transferencias sociais en especie son os bens e servizos individuais proporcionados aos fogares principalmente polas Administracións públicas de xeito gratuíto ou a prezos economicamente non significativos. Son financiados polos impostos, cotizacións e outros ingresos das administracións públicas. Son, principalmente, servizos de educación e sanidade.
No ano 2017 estes bens e servizos ascenderon a 8.307 millóns de euros e proveñen principalmente do sector Administracións públicas (7.846 millóns de euros). Esta contía incrementa a renda dispoñible dos fogares dando lugar á chamada Renda dispoñible axustada.
A distribución da renda dos fogares entre o gasto en consumo final e o aforro
volver ao índice
O aforro do sector fogares reduciuse no ano 2017
O gasto en consumo dos fogares medrou en 2017 un 4,8%, 2,5 puntos máis que o crecemento da renda dispoñible. Como resultado temos unha diminución do aforro do sector fogares en Galicia.
O cociente entre aforro e renda dispoñible denomínase taxa de aforro e no ano 2017 foi do 3,9%.
Fonte: IGE. Contas do sector fogares (descarga dos datos)
Definicións e máis información
volver ao índice