Pensións da Seguridade Social por concello de residencia da persoa pensionista
Resumo de resultados 07/06/2024
ÍNDICE
descarga en pdf
Intodución
O IGE realiza dende o ano 2011 unha explotación do ficheiro de pensións contributivas do sistema da Seguridade Social xestionadas polo Instituto Nacional de la Seguridad Social (INSS) e polo Instituto Social de la Marina (ISM), froito do convenio de colaboración entre os ditos organismos e o IGE (BOE núm. 219, do 12 de setembro de 2011 e renovación en BOE, núm. 55, do 5 de marzo de 2022).
Os datos que se presentan neste apartado son relativos ao colectivo de titulares de pensións contributivas do sistema da Seguridade Social xestionadas polo INSS e polo ISM, residentes na Comunidade Autónoma de Galicia (titulares, con residencia en Galicia, de pensións xestionadas polas direccións provincias da Comunidade Autónoma; titulares, con residencia en Galicia, de pensións xestionadas por outras direccións provinciais). Non se inclúen, polo tanto, aquelas persoas que teñen un sistema de previsión social distinto á Seguridade Social, como por exemplo, os funcionarios de clases pasivas.
Inclúense todas as clases de prestacións: xubilación, incapacidade, xubilación procedente de incapacidade, viuvez, orfandade e a favor de familiares.
O criterio xeográfico empregado para a clasificación dos datos é o concello de residencia do titular da pensión, que se obtén mediante o cruce do ficheiro de Pensións Contributivas da Seguridade Social co Padrón municipal continuo do Instituto Nacional de Estadística (INE).
A data de referencia dos datos é o 31 de decembro de cada ano.
Número de pensionistas e importe medio por sexo e grupo de idade. Galicia
No ano 2023, en Galicia hai 677.870 persoas que perciben pensións contributivas da Seguridade Social, das cales o 50,8% son mulleres.
O 81,4% das persoas que perciben pensións contributivas teñen 65 ou máis anos. O grupo de idade máis frecuente é o de 65 a 74 anos, tanto no caso dos homes (127.164 persoas) como no das mulleres (110.514 persoas).
O importe medio calcúlase como a media da suma dos importes percibidos en pensións contributivas da Seguridade Social por cada pensionista. En Galicia, no ano 2023 este importe situouse en 1.169,12 euros, e no caso dos homes é un 31,7% superior ao das mulleres.
Ao comparar o importe medio segundo o sexo e a idade do pensionista pode observarse que os homes teñen importes medios superiores ás mulleres en todos os grupos de idade. Ademáis, os importes maiores, tanto para homes como para mulleres, atópanse nos grupos de idade intermedios; é dicir, de 55 a 64 anos, de 65 a 74 anos e de 75 a 84 anos. Nestes grupos de idade, o importe medio dos homes é un 39,2%, un 28,8% e un 36,0% superior ao das mulleres respectivamente.
| Idade | Ambos Sexos | Homes | Mulleres | Ambos Sexos | Homes | Mulleres |
|---|---|---|---|---|---|---|
| Total | 677.870 | 333.746 | 344.124 | 1.169,12 | 1.331,95 | 1.011,21 |
| 0-44 | 20.775 | 11.670 | 9.105 | 607,59 | 645,10 | 559,51 |
| 45-54 | 29.222 | 16.060 | 13.162 | 886,02 | 926,24 | 836,96 |
| 55-64 | 75.810 | 41.950 | 33.860 | 1.141,32 | 1.305,46 | 937,98 |
| 65-74 | 237.678 | 127.164 | 110.514 | 1.363,28 | 1.521,62 | 1.181,08 |
| 75-84 | 196.656 | 95.295 | 101.361 | 1.159,62 | 1.342,93 | 987,27 |
| 85 e máis | 117.729 | 41.607 | 76.122 | 980,27 | 1.103,02 | 913,18 |
| Fonte: IGE (descarga da táboa) |
No ano 2023 en Galicia, polo menos o 50% dos/as pensionistas (338.935 persoas) percibiron un importe medio igual ou superior aos 909,61 euros; o 10% percibiron non máis de 572,30 euros.
Por sexos a distribución dos importes medios dos homes presenta unha maior dispersión e as diferenzas acrecéntanse nos importes medios máis elevados. Así, o 25% dos homes perciben un importe medio superior aos 1.700 euros, mentres que no colectivo das mulleres só acadan esta cantidade algo máis do 10% das pensionistas.
| Ambos sexos | Homes | Mulleres | |
|---|---|---|---|
| Percentil 10 | 572,30 | 577,50 | 545,20 |
| Percentil 25 | 743,30 | 783,10 | 743,30 |
| Percentil 50 | 909,61 | 1.084,30 | 797,53 |
| Percentil 75 | 1.427,31 | 1.715,96 | 1.139,02 |
| Percentil 90 | 2.269,99 | 2.670,53 | 1.783,29 |
| Fonte: IGE (descarga da táboa) |
Número de pensionistas e importe medio. Galicia e provincias
En Galicia, no ano 2023, o 39,9% destes pensionistas residía na provincia da Coruña, o 32,3% na provincia de Pontevedra e o 27,8% restante distribúese de forma homoxénea entre Lugo e Ourense. A distribución do número de pensionistas está relacionada coa poboación de cada provincia, xa que, no ano 2023, o 41,6% da poboación de Galicia residía na provincia da Coruña, o 35,1% na provincia de Pontevedra, o 12,0% na provincia de Lugo e o restante 11,3% na provincia de Ourense.
O importe medio nas provincias da Coruña e Pontevedra é superior ao importe medio de Galicia (1.169,12 euros) e en ambas as dúas provincias supera os 1.200 euros. O importe medio acada o valor máis baixo na provincia de Ourense, onde se sitúa nos 1.033,75 euros.
O número de pensionistas en Galicia medrou un 6,8% no período 2011-2023. A provincia na que máis medrou o número de pensionistas foi Pontevedra, na que o incremento é do 12,6% no período, mentres que nas provincias de Lugo e Ourense diminúe lixeiramente (un 4,2% e un 0,4% respectivamente).
Pola súa banda, o importe medio da pensión en Galicia aumentou en 383,66 euros, un 48,8% entre os anos 2011 e 2023. Este importe medio incrementouse en todas as provincias; as provincias nas que máis se incrementou foi A Coruña e Lugo (un 48,6% e un 49,4%) mentres que nas provincias de Ourense e Pontevedra o incremento foi menor (un 47,8% en ambas).
| Espazo | Número | Importe | Número | Importe |
|---|---|---|---|---|
| Galicia | 634.686 | 785,46 | 677.870 | 1.169,12 |
| • A Coruña | 247.467 | 813,30 | 270.790 | 1.208,95 |
| • Lugo | 99.943 | 733,05 | 95.716 | 1.095,38 |
| • Ourense | 92.882 | 699,62 | 92.493 | 1.033,75 |
| • Pontevedra | 194.394 | 817,96 | 218.871 | 1.209,30 |
| Fonte: IGE (descarga da táboa) |
Importe medio por concellos
No 60% dos concellos galegos o importe medio por persoa en pensións contributivas da Seguridade Social non supera os 1.021,61 euros e só en 44 concellos galegos se superan os 1.200 euros.
O 20% dos concellos co importe máis elevado correspóndese principalmente coas zonas dos sete grandes concellos, xunto coa Mariña Lucense, a zona de Valdeorras, As Pontes de García Rodríguez, Bueu, na zona do Barbanza, coa Pobra do Caramiñal e Ribeira, Baiona e Cee.
| Concello | Número | Importe medio | Mediana do importe |
|---|---|---|---|
| Pontes de García Rodríguez, As | 2.747 | 1.755,97 | 1.525,08 |
| Fene | 3.459 | 1.522,88 | 1.284,35 |
| Cervo | 1.402 | 1.507,17 | 1.232,12 |
| Ferrol | 15.295 | 1.465,49 | 1.190,61 |
| Ares | 1.474 | 1.412,68 | 1.094,41 |
| Coruña, A | 54.496 | 1.411,93 | 1.155,07 |
| Mugardos | 1.373 | 1.390,35 | 1.123,65 |
| Vigo | 65.325 | 1.385,98 | 1.137,99 |
| Bueu | 2.920 | 1.382,86 | 1.131,36 |
| Oleiros | 7.290 | 1.381,70 | 1.079,12 |
| Fonte: IGE (descarga da táboa) |
| Concello | Número | Importe medio | Mediana do importe |
|---|---|---|---|
| Avión | 658 | 715,72 | 768,86 |
| Baltar | 370 | 774,20 | 743,30 |
| Santa Comba | 2.985 | 780,17 | 755,19 |
| Padrenda | 579 | 791,15 | 783,10 |
| Tordoia | 1.269 | 795,97 | 772,46 |
| Verea | 370 | 796,99 | 783,10 |
| Quintela de Leirado | 251 | 797,74 | 783,10 |
| Mazaricos | 1.489 | 799,88 | 776,20 |
| Irixo, O | 642 | 802,39 | 783,10 |
| Vimianzo | 2.267 | 803,40 | 783,10 |
| Fonte: IGE (descarga da táboa) |
Nos sete concellos con máis de 50.000 habitantes (grandes concellos), o importe medio é superior ao de Galicia. Ferrol, A Coruña, e Vigo son os concellos con maior importe medio, onde este supera os 1.385 euros. Pola contra, Ourense, cun importe medio de 1.211,21 euros, é o que presenta un valor máis baixo.
A mediana do importe representa o valor central da distribución dos importes, é dicir, o valor por debaixo do cal se atopan a metade das persoas. Así, no concello de Ferrol polo menos o 50% dos/as pensionistas percibe un importe medio igual ou superior a 1.190,61 euros, mentres que no concello de Ourense o valor da mediana non acada os 935 euros.
| Espazo | Número | Importe medio | Mediana do importe |
|---|---|---|---|
| Galicia | 677.870 | 1.169,12 | 909,61 |
| • A Coruña | 54.496 | 1.411,93 | 1.155,07 |
| • Ferrol | 15.295 | 1.465,49 | 1.190,61 |
| • Santiago | 20.011 | 1.369,81 | 1.085,03 |
| • Lugo | 21.430 | 1.258,64 | 966,89 |
| • Ourense | 26.047 | 1.211,21 | 934,98 |
| • Pontevedra | 16.009 | 1.339,69 | 1.050,54 |
| • Vigo | 65.325 | 1.385,98 | 1.137,99 |
| Fonte: IGE (descarga da táboa) |
Altas e baixas anuais de pensionistas con prestacións por xubilación
A variación acumulada, dende 2014 ata 2023, obtida por diferenzas entre altas e baixas anuais de pensionistas residentes perceptores de prestacións por xubilación, permítenos ver que en Galicia o número de pensionistas aumentou de forma constante, cun crecemento de 25.927 pensionistas con pensións de xubilación, e coa única excepción dun notable decrecemento de 1.481 pensionistas en 2020, pola pandemia do COVID.
Porén, o comportamento por provincias e diferenciando segundo o sexo foi desigual. Mentres que A Coruña e Pontevedra absorben o crecemento que se produce en Galicia, Lugo e Ourense experimentan un paulatino decrecemento, máis acentuado no caso de Lugo, onde as pensionistas mulleres descenden en máis de tres mil persoas no período. É significativo ver o distinto comportamento entre homes e mulleres a nivel provincial: mentres os pensionistas homes alcanzan, no ano 2023, o seu máximo crecemento na provincia de Pontevedra (7.737 pensionistas), as pensionistas mulleres experiméntano na provincia da Coruña (11.872 pensionistas).
O importe medio por pensionista das prestacións mensuais brutas tamén experimentou un crecemento no período 2014 a 2023, sendo ano a ano superior o importe medio das altas que o correspondente ás baixas.
Podemos observar como a fenda de xénero nas prestación percibidas foise reducindo ano a ano nas altas de novos pensionistas, sendo así que os pensionistas homes que se incorporaban en 2014 facíano cun importe medio de 1.175,2 euros e en 2023 fixérono con 1.405,9 euros, o que representa un crecemento do 19,6%, fronte ao crecemento do 36,3% que experimentan as novas mulleres pensionistas no mesmo período, pasando de percibir unha media de 807,6 euros en 2014 a 1.100,4 euros en 2023.
Definicións, fontes e máis información
Definicións
- Pensións contributivas da Seguridade Social
- Son prestacións económicas e de duración indefinida, aínda que non sempre, nas que a concesión está xeralmente supeditada a unha previa relación xurídica coa Seguridade Social (acreditar un período mínimo de cotización en determinados casos, …), sempre que se cumpran os demais requisitos esixidos. A súa contía determínase en función das achegas efectuadas polo traballador e o empresario, se se trata de traballadores por conta allea, durante o período considerado para os efectos da base reguladora da pensión de que se trate. As clases de pensións son:
- incapacidade permanente
- xubilación
- morte e supervivencia
Descarga de datos
- Número de pensionistas e importe medio segundo o sexo e o grupo de idade (Galicia e provincias)
- Número de pensionistas e importe medio segundo o sexo e o grupo de idade (Información a nivel comarcal)
- Número de pensionistas e importe medio segundo o sexo (Información a nivel municipal)
- Número de pensionistas e importe medio segundo o grupo de idade (Información a nivel municipal)
- Percentís do importe medio segundo o sexo (Galicia e provincias)
- Número e importe mensual medio das altas e baixas de pensionistas con prestacións por xubilación, por sexo e grupo de idade (Galicia e provincias)
Fontes de información
IGE. Cifras poboacionais de referencia IGE. Pensións contributivas da Seguridade Social INSS, ISM. Rexistro de Prestacións Sociais Públicas