Produto interior bruto municipal

Distribución do produto interior bruto total

Os sete grandes concellos concentran o 42,1% do Produto Interior Bruto de Galicia

Vigo é o concello con maior nivel de actividade produtiva, cun PIB de 7.215 millóns de euros, seguido do concello da Coruña que xerou 6.527 millóns de euros en 2016. Entre ambos concellos achegan o 23,3% do PIB de Galicia.

O concello de Arteixo, con 4.104 millóns de euros, é o terceiro concello en xeración de valor engadido e presenta un incremento do 32% da súa actividade produtiva con respecto a 2014. Tras Arteixo sitúanse os concellos de Santiago de Compostela, Lugo, Ourense, Pontevedra e Ferrol. En todos eles, o PIB medrou con respecto a 2014.

Os concellos do Porriño e As Pontes de García Rodríguez completan a táboa dos dez primeiros concellos por volume de actividade económica.

Os dez concellos de Galicia con maior Produto interior bruto (PIB) municipal no ano 2016
Unidade: miles de euros

Fonte: IGE. Produto interior bruto municipal (descarga da táboa)

Produto interior bruto por habitante

Arteixo é o concello con maior PIB por habitante no ano 2016

Os concellos con maior PIB por habitante caracterízanse por ter uns niveis de actividade moi relevantes no seu concello pero non se atopan entre os máis poboados de Galicia. Arteixo, cunha poboación de máis de 30.000 habitantes, é a excepción entre os que teñen máis PIB por habitante.

Os concellos cun maior nivel de PIB por habitante presentan cando menos unha das seguintes características:

• Son concellos que contan cun tecido industrial consolidado, están próximos aos grandes núcleos de poboación e teñen acceso a vías de comunicación de alta capacidade. Neste grupo podemos clasificar ao concello de Arteixo, San Cibrao das Viñas, Pereiro de Aguiar, Rábade, O Porriño ou Bergondo.
• Son concellos nos que o emprazamento dun grupo empresarial elevou os niveis de actividade económica: Arteixo é o principal exemplo, pero As Pontes de García Rodríguez, Cervo, As Somozas ou Cerceda tamén se atopan neste grupo.
• Son concellos nos que se xera un valor engadido moi elevado pola explotación dun recurso natural –mineiro ou enerxético fundamentalmente – como ocorre nos casos de Carballeda de Valdeorras, Muras, Manzaneda, As Pontes de García Rodríguez, Cerceda, Vilariño de Conso ou Nogueira de Ramuín.

Estrutura produtiva dos concellos de máis de 20.000 habitantes

Naqueles concellos de máis de 20.000 habitantes preséntase unha desagregación do PIB municipal en catro grandes sectores económicos, máis os impostos netos sobre os produtos.

Para o conxunto da economía galega do ano 2016 o sector primario achegou o 4,8% do PIB, a Industria e enerxía o 16,6%, a construción o 6,3%, o sector servizos o 63,1% e os impostos sobre os produtos representan o 9,1% restante. Tomando como referencia estes datos, e á vista da estrutura produtiva dos concellos de máis de 20.000 habitantes, podemos destacar os seguintes trazos deste grupo de concellos:

• Vigo destaca pola contribución do seu sector industrial (achegou un 19,9% ao seu PIB), porén o seu sector primario e da construción pesan menos que en Galicia.
• No concello da Coruña destaca a achega do sector servizos, que representa un 73,1% do PIB, isto é, dez puntos máis que no conxunto da comunidade autónoma.
• Nos concellos de Ribeira e Lalín o sector primario achega o 15 e o 13,3% do seu PIB respectivamente. Pola contra, en ambos concellos o sector servizos presenta achegas que rondan o 50% do seu PIB.
• En Narón, Redondela e Ribeira o peso do sector industrial no PIB supera o 20%.
• Nos concellos de Santiago de Compostela, Ferrol, Lugo, Ourense e Pontevedra o sector servizos supera o 70%.
• O sector da construción achega máis do 10% do PIB nos concellos de Culleredo, Oleiros, Cangas, A Estrada, Lalín, Carballo e Ames

Estrutura do Produto Interior bruto (PIB) dos concellos de máis de 20.000 habitantes. Ano 2016
Unidade: porcentaxe sobre o PIB

Fonte: IGE. Produto interior bruto municipal (descarga da táboa)

Distribución do produto interior bruto total

A comarca da Coruña é a principal de Galicia en termos de actividade económica. En 2016 xerou un PIB de 12.848 millóns de euros, o que representa o 21,8% do total de Galicia. Con respecto ao 2014 medrou un 15%. A este crecemento contribuíu especialmente o incremento do valor engadido xerado no sector servizos, en particular na rama de actividade “Comercio, transporte e hostalería”.

A comarca de Vigo tivo un PIB de 9.801 millóns de euros, que representa un 16,6% do total galego e entre 2014 e 2016 medrou un 4,6%.

As seguintes comarcas, en orde de magnitude, son as de Santiago, Ourense, Ferrol, Lugo e Pontevedra. Estas sete comarcas achegan o 65,1% do PIB de Galicia e todas elas presentan crecemento dende o ano 2014.

Fóra das comarcas cuxa cabeceira é unha gran cidade, destacan as comarcas do Salnés, Barbanza e O Morrazo. A suma destas tres comarcas representan un 7,2% do PIB galego

Cómpre destacar a evolución do PIB das comarcas de Caldas, Tabeirós-Terra de Montes e O Sar, con crecementos superiores ao 10%.

As dez comarcas de Galicia con maior Produto interior bruto (PIB). Ano 2016
Unidade: miles de euros, taxa de variación interanual e achega ao PIB en %

Fonte: IGE. Produto interior bruto municipal (descarga da táboa)

Produto interior bruto por habitante

Ao igual que pasaba no caso dos concellos, se falamos de PIB por habitante a situación das comarcas é diferente. A comarca do Eume presenta un PIB por habitante de 35.227 euros, é dicir, un 62% superior á media de Galicia. A comarca da Coruña rexistra a segunda cifra de PIB por habitante con case 32.500 euros. A comarcas da Mariña Occidental e da Terra de Trives sitúanse en terceiro e cuarto lugar respectivamente, mentres a comarca de Santiago é a quinta cun PIB por habitante que supera os 26.000 euros.

A Comarca de Valdeorras, sexta neste baremo, rexistrou unha subida do PIB por habitante dun 12% consecuencia dun crecemento da actividade produtiva positiva (o seu PIB total medrou un 9,4% entre 2014 e 2016) e un comportamento demográfico negativo (a poboación caeu un 2,3% nese período).

A Paradanta, Muros, O Condado, A Baixa Limia e Terra de Celanova están entre as comarcas con menor actividade produtiva por habitante. En todas elas o PIB por habitante é inferior ao 60% da media de Galicia.

Especialización produtiva por comarca

As estimacións publicadas polo IGE achegan información da estrutura produtiva das comarcas cun nivel de desagregación de 12 ramas de actividade. Este detalle permite construír uns índices de especialización relativa, que comparan a estrutura produtiva de cada comarca coa de Galicia, identificando aqueles sectores máis predominantes, en termos relativos, nas comarcas galegas.

Dezaoito comarcas teñen especialización produtiva no sector primario (inclúe agricultura, gandaría, pesca e silvicultura) e once comarcas teñen especialización produtiva no sector enerxético (Eume, Ordes, Noia, Chantada, Baixa Limia, O Ribeiro, Terra de Caldelas, Terra de Celanova, Terra de Trives, Viana e A Paradanta).

A presenza industrial é sobranceira en varias comarcas:

• Especialización produtiva no sector da extracción e fabricación doutros minerais non metálicos: comarcas de Ortegal, A Fonsagrada, Quiroga, Sarria, Valdeorras e O Baixo Miño. O 45,6% do valor engadido galego deste sector xérase nestas comarcas. A importancia do sector na comarca de Valdeorras queda reflectida polo seguinte dato: o 26% do PIB comarcal provén deste tipo de actividades produtivas.
• Especialización produtiva no sector da madeira (inclúe a industria da madeira, do papel e fabricación de mobles): comarcas de Betanzos, Ferrol, Santiago, O Sar, Lugo, Pontevedra e Tabeirós-Terra de Montes. O número de comarcas que presenta este tipo de especialización incrementouse desde 2014, consecuencia dunha evolución positiva no sector (para o conxunto de Galicia do VEB xerado por este sector medrou un 27%).
• Especialización produtiva no sector industrial agroalimentario: comarcas do Barbanza, O Condado e O Morrazo. No Barbanza esta industria, fundamentalmente conserveira e de conxelado de pescado, achega o 16,7% do seu Produto Interior Bruto.
• A comarca de Vigo presenta especialización produtiva no sector de fabricación de material de transporte e grandes reparacións (inclúe a fabricación de automóbiles e a construción naval, entre outras). Na comarca de Vigo o sector é o responsable do 12,3% do PIB comarcal.
• Especialización produtiva no sector da metalurxia, produtos metálicos, electrónicos, eléctricos e maquinaria: comarcas de Fisterra, A Mariña Occidental, Caldas e O Salnés. Na Mariña Occidental este sector é o responsable do 24,3% da actividade produtiva comarcal.

A Comarca da Coruña é a única que presenta especialización relativa no sector do Comercio, transporte e hostalería. Dúas comarcas, Bergantiños e o Carballiño, teñen especialización produtiva no sector da Construción e ningunha das comarcas galegas na Administración pública, sanidade, educación e outros servizos.

Especialización produtiva por comarca. Ano 2016

Fonte: IGE. Produto interior bruto municipal

NOTA: calcúlase un índice de especialización para cada comarca e sector como o cociente entre o peso do VEB do sector na comarca e o peso do VEB do sector na economía galega. En cada comarca defínese o sector de especialización como aquel que presenta o maior valor dos índices anteriores.