Introdución

Os Indicadores de demografía empresarial é unha actividade estatística que elabora o Instituto Galego de Estatística (IGE) con carácter anual.

O obxectivo desta actividade é proporcionar información agregada relativa ás empresas con actividade económica en Galicia (sen incluír o sector primario nin a administración pública), tendo en conta aspectos relativos ao dinamismo empresarial e aplicando unha metodoloxía acordada no ámbito da Unión Europea. Elabóranse indicadores relativos ao stock, nacementos, mortes e supervivencia das empresas a partir da explotación estatística do Directorio de empresas e unidades locais.


Número de empresas e taxas de nacemento e morte

O número de empresas con actividade económica en Galicia a principio do ano 2022 foi de 205.452, un 1,42% menos que no 2021.

O 78,98% destas empresas corresponde ao sector servizos, o 14,17% á construción e o 6,85% á industria.

A taxa de nacemento de empresas (cociente entre as creadas e as existentes a principio do ano) foi 8,99% no ano 2022. Pola súa parte, a taxa de mortes (cociente entre as empresas que desaparecen e as existentes a principio de ano) foi 8,06% nese mesmo ano. Como resultado, a taxa de crecemento neto foi do 0,93%.

O sector económico con mellor saldo demográfico empresarial no ano 2022 foi o sector servizos, cunha taxa neta do 1,16%.


Número de empresas e taxas de nacemento e morte segundo o sector económico. Galicia. Ano 2022
Unidade: empresas, %

Variable Total Industria, incluida a enerxía Construción Servizos
Número de empresas a principio de ano 205.452 14.067 29.115 162.270
Taxa de nacementos (%) 8,99 5,62 8,78 9,32
Taxa de mortes (%) 8,06 6,66 8,20 8,16
Taxa neta (%) 0,93 -1,04 0,57 1,16

Fonte: IGE. Indicadores de demografía empresarial (descarga da táboa)


Tamén se pode analizar a evolución da demografía empresarial segundo o tamaño da empresa. Neste caso, todas as tipoloxías, agás as medianas empresas, rexistraron unha taxa de crecemento neto positiva ou nula entre 2021 e 2022. A tipoloxía das microempresas foi a que rexitrou un valor para este indicador máis alto: a súa taxa neta de crecemento situouse en 0,96 en 2022. No caso das grandes empresas a taxa neta en 2022 é igual a 0, o que quere dicir que o saldo creadas menos desaparecidas nese ano foi nulo: xurdiu igual número de empresas desta tipoloxía en Galicia que o número de desaparecidas.


Número de empresas e taxas de nacemento e morte segundo o tamaño da empresa. Galicia. Ano 2022
Unidade: empresas, %

Variable Microempresa Pequena empresa Mediana empresa Gran empresa
Número de empresas ao principio de ano 196.135 7.790 1.282 245
Taxa de nacementos (%) 9,31 2,25 1,79 0,82
Taxa de mortes (%) 8,36 1,86 1,95 0,82
Taxa neta (%) 0,96 0,39 -0,16 0,00

Fonte: IGE. Indicadores de demografía empresarial (descarga da táboa)


Ao analizar a evolución das taxas de nacementos e mortes de empresas, cómpre destacar que 2015 foi o primeiro ano dende 2008 no que a taxa de nacementos de empresas supera á de mortes. En 2020 a taxa neta foi negativa, rompendo desta forma cunha racha de cinco anos seguidos con taxas netas de crecemento positivas; en 2021 tamén foi negativa. En 2022 o valor deste indicador volveu ser positivo; situouse en 0,93%.


Evolución das taxas de nacementos e mortes de empresas. Galicia
Unidade: %

Fonte: IGE. Indicadores de demografía empresarial (descarga da táboa)


Supervivencia

No ano 2022, das empresas creadas no ano 2021, permanecen abertas o 76,61%. Se analizamos a permanencia despois de 5 anos, pódese comprobar que o número inicial de empresas queda reducido ao 37,89%.


Taxa de supervivencia ano a ano. Galicia
Unidade: %

Ano de nacemento 2014 2015 2016 2017 2018 2019 2020 2021 2022
2014 100 78,03 67,10 58,22 52,33 46,88 45,11 42,58 40,68
2015 – 100,00 77,84 58,26 50,76 44,34 41,75 39,04 37,61
2016 – – 100,00 74,36 62,07 52,89 48,43 45,34 42,85
2017 – – – 100,00 60,65 50,59 44,00 40,38 37,89
2018 – – – – 100,00 84,80 56,91 49,08 44,94
2019 – – – – – 100,00 61,68 54,00 47,06
2020 – – – – – – 100,00 50,29 44,41
2021 – – – – – – – 100,00 76,61

Fonte: IGE. Indicadores de demografía empresarial (descarga da táboa)


Neste gráfico cuantifícanse as desaparicións das empresas nos catro primeiros anos de vida. Así, do total de empresas creadas no ano 2018, no 2022 só permanecen o 44,94%.

Por outra parte, ao considerar as empresas creadas no período 2006-2018, as que presentan un valor máis alto da taxa de supervivencia aos 4 anos son as creadas no ano 2007.

No ano 2022 a taxa de supervivencia das PEMES creadas no ano 2018 sitúase en 44,92%, mentres que no caso dos/das autónomos/as sitúase no 38%.


Taxa de supervivencia aos 4 anos. Galicia
Unidade: %

Fonte: IGE. Indicadores de demografía empresarial (descarga da táboa)


Taxa de actividade emprendedora

A taxa de actividade emprendedora (TEA) mide a porcentaxe de poboación involucrada en iniciativas emprendedoras de menos de 42 meses de actividade, respecto da poboación activa. En Galicia este indicador sitúase no ano 2022 no 5,39% e presenta un leve incremento respecto ao ano anterior.


Taxa de actividade emprendedora (TEA). Galicia
Unidade: %

Fonte: IGE. Indicadores de demografía empresarial (descarga da táboa)


Resultados por municipios

Taxa de crecemento empresarial por concellos
Unidade: %

Fonte: IGE. Indicadores de demografía empresarial (descarga da táboa)


Definicións e máis información

Definicións

Máis información