Introdución

A Enquisa de poboación activa (EPA) é unha investigación por mostraxe, continua e dirixida ás vivendas familiares que o Instituto Nacional de Estadística (INE) realiza desde 1964. En xullo de 2008 firmouse un convenio de colaboración entre o INE e o Instituto Galego de Estatística (IGE) para a duplicación da mostra no ámbito territorial da Comunidade Autónoma de Galicia.

O regulamento (CE) nº 1372/2007 do Parlamento Europeo e do Consello establece a obrigatoriedade de incluír a variable salario do traballo principal na Enquisa de Forza de Traballo da Unión Europea (Enquisa de poboación activa en España); deste xeito, introdúcese como variable de clasificación o nivel de remuneración na análise das características do emprego principal para os traballadores e as traballadoras por conta allea ou persoas asalariadas. Na Enquisa de poboación activa o INE optou por empregar rexistros administrativos para obter esta variable (ver metodoloxía).

O salario mensual calculouse dividindo por doce o total salarial percibido no ano, polo que se prorratearon os pagos salariais que non teñen periodicidade mensual (entre outras, as pagas extraordinarias). O regulamento esixe que o salario se codifique en deciles; polo tanto, unha vez estimados os salarios mensuais, calculáronse os deciles da distribución salarial e clasificouse ás persoas en función do decil ao que pertencían. Así, no decil 01 está incluído o 10% dos asalariados e das asalariadas que perciben o salario máis baixo; pola súa banda, o decil 10 corresponde ao grupo do 10% das persoas que perciben o salario máis alto.


Salario medio e mediano

O salario medio foi en Galicia de 2136.1 euros brutos ao mes no ano 2023, cun aumento de 97,5 euros (un 4,8%) respecto a 2022. Pola súa banda, o salario mediano (valor que, ordenando as persoas asalariadas de menor a maior salario, deixa a metade por baixo dese valor e a outra metade por riba) sitúase en 1.855,6 euros, cunha subida de 127,3 euros (7,4%) respecto do ano anterior

Fonte: IGE. Enquisa de poboación activa. Decil de salarios do emprego principal (descarga da táboa)

O salario medio das persoas asalariadas a tempo completo foi de 2.364,9 euros brutos ao mes, mentres que para os traballadores a tempo parcial foi de 895,2 euros.

Os homes gañaron de media 387,2 euros máis que as mulleres; os primeiros ingresaron arredor de 2.330,2 euros brutos ao mes, mentres que o salario medio mensual das mulleres situouse nos 1.943 euros brutos ao mes en 2023.O salario mediano tamén foi superior nos homes que nas mulleres.


Salario medio e mediano por tipo de xornada e sexo. Galicia. Ano 2023
Unidade: euros/persoa

Media
Mediana
Xornada Total Homes Mulleres Total Homes Mulleres
Total 2.136,1 2.330,2 1.943,0 1.855,6 2.000,0 1.648,0
Completa 2.364,9 2.444,4 2.269,0 2.005,9 2.056,4 1.909,6
Parcial 895,2 902,4 892,9 800,0 780,2 807,5

Fonte: IGE. Enquisa de poboación activa. Decil de salarios do emprego principal (descarga da táboa)

Tipo de xornada

Un factor determinante á hora de analizar os salarios das persoas traballadoras é o tipo de xornada laboral que realizan. Deste xeito, os traballadores e as traballadoras con xornada parcial concentraranse con maior frecuencia nos tramos salariais máis baixos.

En 2023 o 60,83% das persoas asalariadas de Galicia con xornada parcial gañou menos de 967,2 euros mensuais (en termos brutos); o 22,42% entre 967,2 e 1.322,6 euros e, finalmente, o 16,75% restante máis de 1.322,6 euros mensuais. Pola contra, entre as persoas asalariadas con xornada completa, a porcentaxe das que ingresaron menos de 967,2 euros ao mes sitúase no 0,61%.

O colectivo de persoas asalariadas con xornada completa representaba en 2023 o 84,43% do total de asalariados e asalariadas de Galicia. O 18,69% destas persoas ingresou menos de 1.494,2 euros ao mes, o 46,02% entre 1.494,2 e 2.367,4 e o 35,31% máis de 2.367,4 euros mensuais.


Persoas asalariadas por tipo de xornada e decil salarial. Galicia. Ano 2023
Unidade: porcentaxe sobre o total de persoas asalariadas por tipo de xornada (%)

Decil Total Completa Parcial
Total 100 100,00 100,00
Menos de 967,2 euros 10 0,61 60,83
De 967,2 a < 1.322,6 euros 10 7,73 22,42
De 1.322,6 a < 1.494,2 euros 10 10,35 7,99
De 1.494,2 a < 1.667,8 euros 10 11,27 3,22
De 1.667,8 a < 1.855,6 euros 10 11,45 2,10
De 1.855,6 a < 2.081,0 euros 10 11,68 0,84
De 2.081,0 a < 2.367,4 euros 10 11,62 1,26
De 2.367,4 a < 2.851,6 euros 10 11,66 0,98
De 2.851,6 a < 3.552,3 euros 10 11,80 0,35
3.552,3 ou máis euros 10 11,85 0,00

Fonte: IGE. Enquisa de poboación activa. Decil de salarios do emprego principal (descarga da táboa)


Sexo

Segundo o sexo da persoa, o 18,67% dos homes recibiu un salario inferior aos 1.494,2 euros mensuais en 2023; o 46,91% gañou entre 1.494,2 e 2.367,4 e o 34,43% percibiu máis de 2.367,4 euros.

Entre as mulleres, a porcentaxe incluída no primeiro dos intervalos (menos de 1.494,2 euros/mes) sobe ata o 41,19%. Hai que ter en conta que en 2023 o 7,4% dos homes tiña xornada parcial fronte ao 23,7% das mulleres.


Persoas asalariadas por sexo e decil salarial. Galicia. Ano 2023
Unidade: porcentaxe sobre o total de persoas asalariadas por sexo (%)

Decil Total Homes Mulleres
Total 100 100,00 100,00
Menos de 967,2 euros 10 5,32 14,60
De 967,2 a < 1.322,6 euros 10 6,89 13,10
De 1.322,6 a < 1.494,2 euros 10 6,46 13,49
De 1.494,2 a < 1.667,8 euros 10 10,00 10,01
De 1.667,8 a < 1.855,6 euros 10 12,74 7,27
De 1.855,6 a < 2.081,0 euros 10 12,61 7,40
De 2.081,0 a < 2.367,4 euros 10 11,56 8,47
De 2.367,4 a < 2.851,6 euros 10 11,80 8,23
De 2.851,6 a < 3.552,3 euros 10 10,48 9,55
3.552,3 ou máis euros 10 12,15 7,88

Fonte: IGE. Enquisa de poboación activa. Decil de salarios do emprego principal (descarga da táboa)


Distribución das persoas asalariadas segundo o decil salarial e o sexo. Galicia. Ano 2023
Unidade: porcentaxe sobre o total de persoas asalariadas por sexo (%)

Fonte: IGE. Enquisa de poboación activa. Decil de salarios do emprego principal (descarga da táboa)


Nivel de estudos

Na seguinte táboa pódese observar como, en termos xerais, o salario increméntase a medida que aumenta o nivel de formación da persoa.

En 2023 case a metade (o 44,48%) das persoas asalariadas con estudos superiores ingresou máis de 2.367,4 euros ao mes; o 18,59% das persoas con educación secundaria de segunda etapa completada ingresa máis desta cantidade. Esta porcentaxe sitúase no 11,23% para as persoas que non completaron a segunda etapa da educación secundaria e no 12,41% para as persoas analfabetas ou con estudos primarios. En 2023 o 42,49% da poboación con menor nivel de formación (analfabeta ou con estudos primarios) percibiu un salario inferior aos 1.494,2 euros ao mes.


Persoas asalariadas por nivel de estudos e decil salarial. Galicia. Ano 2023
Unidade: porcentaxe sobre o total de persoas asalariadas por nivel de estudos (%)

Decil Total Analfabetos e estudos primarios Educación secundaria. Primeira etapa Educación secundaria. Segunda etapa Estudos superiores
Total 100 100,00 100,00 100,00 100,00
Menos de 967,2 euros 10 23,53 14,68 12,70 6,13
De 967,2 a < 1.322,6 euros 10 8,50 13,74 11,93 7,45
De 1.322,6 a < 1.494,2 euros 10 10,46 11,45 13,47 7,72
De 1.494,2 a < 1.667,8 euros 10 14,38 15,58 10,82 6,89
De 1.667,8 a < 1.855,6 euros 10 18,95 15,13 11,69 6,51
De 1.855,6 a < 2.081,0 euros 10 7,19 10,82 9,37 9,99
De 2.081,0 a < 2.367,4 euros 10 3,27 7,36 11,49 10,82
De 2.367,4 a < 2.851,6 euros 10 5,88 5,93 8,93 12,54
De 2.851,6 a < 3.552,3 euros 10 2,61 3,68 5,36 15,29
3.552,3 ou máis euros 10 3,92 1,62 4,30 16,65

Fonte: IGE. Enquisa de poboación activa. Decil de salarios do emprego principal (descarga da táboa)



Definicións e máis información