Conta Satélite do Deporte. Revisión estatística 2024
27/12/2024
ÍNDICE
descarga en pdf
Introdución
A Conta Satélite do Deporte é unha actividade estatística de síntese cuxo obxectivo principal é proporcionar un sistema de medición económica do sector do deporte, que permita valorar a importancia deste sector no conxunto da economía galega. Este proxecto xurdiu a iniciativa da Secretaría Xeral do Deporte (Consellería de Presidencia, Xustiza e Deportes), que solicitou ao IGE a cuantificación da dimensión económica do sector.
As contas satélite permiten afondar no coñecemento dun determinado aspecto da economía dun territorio, ampliando a información do sistema de contas económicas. No eido do deporte, no que existe información dispersa tanto de tipo económica como doutro tipo, unha conta satélite axuda a sintetizar toda esta información.
A definición estatística do sector do deporte non está regulamentada en Europa, aínda que existe unha proposta de clasificación baseada en estandares estatísticos chamada a Clasificación de Vilnius. Porén, a viabilidade da estimación dos agregados económicos consonte a esta definición está constrinxida pola dispoñibilidade de fontes para construír unha valoración económica do deporte.
A Conta Satélite do Deporte de Galicia achega información da conta de produción, explotación e o emprego do sector do deporte na nosa Comunidade autónoma. O sector do deporte definido na conta satélite toma como referencia a Clasificación de Vilnius restrinxíndoa aos denominados produtos e servizos característicos do deporte: aqueles que non existirían se non fose polo deporte. Na metodoloxía desta actividade detállanse os códigos CNAE-09 incluídos na definicion do sector e o procedemento de estimación en cada caso.
A publicación, que nesta edición achega datos para os anos 2021 e 2022, é coherente coas operacións estatísticas do Sistema de Contas Económicas de Galicia en Revisión estatística 2024.
A achega do sector do deporte á economía galega
No ano 2022 o valor engadido bruto xerado polo sector do deporte en Galicia ascendeu a 620.180 miles de euros, o que representa o 0,9% do Produto Interior Bruto xerado na Comunidade autónoma en dito período. Con respecto a 2021 o valor xerado a prezos correntes polo sector medrou a unha taxa do 9,6%.
| Operacion | Dato | Peso na economía (%) |
|---|---|---|
| P.1 Produción a prezos básicos | 1.131.225 | 0,8 |
| P.2 Consumos intermedios | 511.045 | 0,6 |
| B.1 Valor engadido bruto | 620.180 | 0,9 |
| D.1 Remuneración de asalariados | 514.813 | 1,6 |
| D.11 Soldos e salarios | 424.265 | 1,7 |
| D.12 Cotizacións sociais | 90.548 | 1,3 |
| D.29-D.39 Outros impostos sobre a produción netos de subvencións | -7.096 | -2,1 |
| B.2 Excedente bruto de explotación / Renda mixta | 112.463 | 0,3 |
|
Fonte: IGE. Conta Satélite do Deporte. (Descarga da
táboa) |
En termos de emprego, o sector é responsable directo de 16.436 postos de traballo, que representan o 1,4% do total do emprego da economía galega. A meirande parte do emprego é asalariado, cuxa remuneración alcanzou os 514.813 miles de euros. Esta masa salarial representa o 1,6% da Remuneración de asalariados total da economía galega.
| Operacion | Unidades | Peso na economía (%) |
|---|---|---|
| Postos de traballo | 16.436 | 1,4 |
| Postos de traballo equivalentes a tempo completo | 13.008 | 1,3 |
|
Fonte: IGE. Conta Satélite do Deporte. (Descarga da
táboa) |